Көпбалалы аналар үшін сүйінші хабар!
Төрт баласы бар отбасыларға қайтадан арнайы куәліктер берілетін болды. Бұл туралы министр Бердібек Сапарбаевтің өзі мәлімдеді. Былтырдан бері тоқтатылған бұл құжатты алу үшін тұрғындар Халыққа қызмет көрсету орталығына барып, жолығуы керек. Бұл туралы «Евразия» телеарнасы хабарлады.
Міне, осы бір тілімдей көк қағаз, көк куәлік. Былтырдан бері тоқтатып тастады. Төртінші перзенті 2018 жылы дүниеге келген отбасылар осы бір құжатты ала алмай, көптеген жеңілдіктен қағылған еді.
ДИНАРА БОТАПОВА – КӨП БАЛАЛЫ АНА: «2018 жылы босанғанмын. Мамыр айында. Ілінбей қалдым. 5 ай кешіктім. Жақында барғанымда наурыз айында закон әлі жоқ деді. Қазір естіп отырмын».
Динара секілді, 2018 жылы төртінші сәбиін босанып көпбалалы мәртебесіне ілінбей қалғандар көп еді. Енді жаңа Үкімет, Мәдина Әбілқасымованы алмастырған жаңа министр осы олқылықтардың орнын толтырып жатыр. Көп балалыларға берілетін куәліктерді алу үшін Халыққа қызмет көрсету орталығына баруы тиіс ата-аналар.
БЕРДІБЕК САПАРБАЕВ – ҚР ЕҢБЕК ЖӘНЕ ХАЛЫҚТЫ ӘЛЕУМЕТТІК ҚОРҒАУ МИНИСТРІ:»4 баладан жоғары баласы бар отбасы көпбалалы болып есептеледі. Оны растайын арнайы куәліктер қайтадан берілуде. Оны «Азаматтарға арналған үкімет» корпорациясы береді. Сондықтан ата-аналар халыққа қызмет көрсету орталығына барып жолығуына болады.»
21 мың теңге жәрдемақының жырына қатысты ел арасында әзіл-шыны аралас неше түрлі әңгіме тарады. Мұны әлеуметтік қорғау министрі Сапарбаев мырзаның өзі де мойындады. Мойныдап қана қоймады, нүктесін қойды.
БЕРДІБЕК САПАРБАЕВ – ҚР ЕҢБЕК ЖӘНЕ ХАЛЫҚТЫ ӘЛЕУМЕТТІК ҚОРҒАУ МИНИСТРІ:»Негізгі түсінбеушілік табысты есептеуден болды. Әсіресе, малына, егініне байланысты. Көп көтерілген сұрақ тауық жұмыртқа деген. Оның бәрін есептемеу керек. Одан кейінгі көкөніс, алмасы бар, шиесі бар, құлпынайы бар, оны да есептемеу керек.»
Министрдің мәліметінше, қазіргі таңда 160 мың отбасына Атаулы әлеуметтік көмек берілген. Алайда 10 мыңдай отбасына мұндай жәрдемақыны ала алмады. Себебі, олардың табысы белгіленген критерийлерден асып кетіпті. Жалпы жыл соңына дейін осы атаулы әлеуметтік көмек үшін бюджетте 130 млрд теңге қарастырылып отыр.
