Ұландықтар Фариза Оңғарсынованың 85 жылдық мерейтойын атап өтті
🔹 Шымкентте ұландықтар Фариза Оңғарсынованың 85 жылдық мерейтойын атап өтті
Шымкент қалалық орталықтандырылған Абай атындағы кітапхананың мамандары 6506 әскери бөлімімен бірлесіп, қазақтың көрнекті ақыны, қоғам қайраткері Фариза Оңғарсынованың 85 жылдық мерейтойына арналған әдеби-танымдық іс-шара өткізді.
Шара барысында кітапхана мамандары ақынның өмірі мен шығармашылығы туралы мазмұнды баяндама жасап, оның әдеби мұрасы мен қазақ мәдениетіне қосқан үлесін талқылады. Фариза Оңғарсынованың поэзиясы ұлттық рух пен отансүйгіштіктің жарқын үлгісі ретінде бағаланып, оның туындыларының бүгінгі ұрпаққа берер тәрбиелік маңызы ерекше атап өтілді.
Іс-шараға 6506 әскери бөлімінің офицерлері мен сарбаздары қатысып, ақынның патриоттық өлеңдерін мәнерлеп оқыды. Сонымен қатар, кітапхана қорынан Фариза Оңғарсынованың шығармаларының көрмесі ұйымдастырылып, сарбаздар үшін әдебиеттермен танысу мүмкіндігі ұсынылды.
Бұл бастама жас ұрпаққа ұлы тұлғаның рухани құндылықтарын дәріптеп, патриоттық сезімді нығайтуға бағытталған маңызды қадам ретінде бағаланады. Іс-шара соңында қатысушылар ақынның поэзиясына деген құрметін білдіріп, алғыс айтты.
Мұндай танымдық кездесулер 6506 әскери бөлімінде сарбаздардың рухани-мәдени деңгейін көтеруге және ұлттық мұраға деген сүйіспеншілікті арттыруға зор ықпал етеді.
А.Орынғали
