Жалаңаш жігіт ұлттық киімді насихаттағысы келген
Тағы да шешінді. Бұл жолы бойжеткендер емес, тепсе темір үзетін апталдай жігіттер! Осыдан бірнеше күн бұрын әлеуметтік желіде жалаңаш денесіне жартылай шапан жапқан қазақ жігітінің суреті тарап, халықтың ызасын тудырды. «Ең сорақысы танымалдылыққа ие болғысы келетін жастар үшін ұлттық киімдер ойыншыққа айналуда, тіпті бұл салт-дәстүрді мазақ етуде», дейді қоғам белсенділері. Бұл туралы «Евразия» телеарнасы хабарлады.
Желіні шулатқан модель жігіт осы. Оны іздеп табу бізге оңайға түспеді. Есімі — Айсұлтан. Жасы — 19-да. Колледж студенті. Оның сөзінше халық арасында у-шу тудырған мына фотоға әдейі түсіпті. Өйткені…
АЙСҰЛТАН, МОДЕЛЬ ЖІГІТ:»Менің айқын мақсатым болғанын жасырмаймын. Ұлттық киімде суретке түсу өзге елде әлдеқайда дамыған. Мұны біздің менталитетке протест ретінде түскенімді жасырмаймын. Шыны керек, шапанды біз тек 22-ші наурызда болмаса, тойға сый-сияпат беретін кезде еске түсіреміз. Ал басқа күндері ол шаң басып жатады. Неге біз оны басқаша насихаттамаймыз?»
Десе де желі қолданушылары денесіне шапан жапқан жігітті жерден алып жерге салуда. Ал кейбір қоғам белсенділері оны заң алдында жауапқа тарту керектігін айтуда. Өйткені көрші Қырғызстан елінде ұлттық киімді осылай қорлағандарға жаза қолданады екен.
КАМИША ЕСМҰХАМБЕТҚЫЗЫ, ЗАҢГЕР:»Бізде сәукеле болсын, шапан болсын. Ол ұлттық деңгейдегі болмысымыз. Жартылай жалаңштап киюге, қыздарымыз жалаңштап сәукелемізді пайдалануға мен қарсымын. Жалпы ұлттық тәрбие болу керек. Егерде Қазақстанда идеология жақсы жұмыс істесе, мүндай әрекетке бармайтын еді. Хайп жасамайтын еді. Өкінішке орай бізде идеология дұрыс жұмыс істемейді».
Бұған дейін бесіктен белі шықпаған бойжеткендердің оғаш қылықтары мен ерсі әрекеттерін жиі көрген халық уақыт өте назар аудармайтын деңгейге жетті. Ал тепсе темір үзетін қазақ жігітінің жалаңаш суреті ер азаматтардың қытығына, тіпті намысына тигенін жасырмайды.
ЕРСЕЙІТ АЛИМОВ, ҚОҒАМ БЕЛСЕНДІСІ: «Мынадай азғыратын, осындай адамның ақылына сыймайтын іс-әрекеттерге баратын жігіттерді тәртіп сақшылары бүкіл адамның әрекетін бақылайтын мемлекеттік органдар болсын, осындай әрекеттерді дереу кесіп алғандай қылып, апарып тәртіпке салып мойнына заңды түрде ақшалай басқа айтыптар тағатын болса, ол жігіт екінші рет ондай әрекеттерге бармайды»
ГҮЛНӘЗИЯ ЖАЛҒАСҚЫЗЫ, ТІЛШІ: «Бүгінде жастар арасында шешіну дерті белең алуда. Қыздарды қойып енді жігіттер өз дене-мүшелерін көрсетіп әлек. Осыған байланысты ел-жұрттың пікірін біліп көрейік. Сәлеметсіздер ме! Қараңыздаршы..».
«Өздерінше оригинал, эксклюзив болғысы келген шығар!»
«Әлеуметтік желіде мынадай суреттер таралып жатыр. Осыған ойыңыз қанадй?Өте ұят нәрсе, жылағым келеді. Жігіттеріміз де дәл осыны қайталап, тек қана шапанмен?Мынау қазақи жігіттерге келмейтін сияқты ғой»
» Ер адам деген ерекетік қабілетін сақтау керек қой. Мынау не енді?»
«Масқара ғой, басқа қойнымсыз деуші еді»
«Кеше ғана жігіттеріміз шапан киіп шықты…Жігіттеріміз де соларға еліктеп шығып жатқан шығар. Жігіттер деген біздің қорғанышымыз, тірегіміз».
Әрине еш қымсынбастан жалаңаш тәнін көрсетіп, ерсі әрекетімен елге танымал болғысы келетін қаракөздеріміздің қарасы көбейіп кеткені белгілі. Бірі төсін ашып тыраштанса, қалғаны тәнінің сұлулығын жалпақ жұртқа жариялап әлек. Ал Айсұлтанның сөзінше, ол әлгі қыздардың жолын қумайды. Арманы мен мақсаты да бөлек.
АЙСҰЛТАН, МОДЕЛЬ ЖІГІТ:»Негізі суретті мен өзім үшін түсіргенмін. Ал оның қалай әлеуметтік желігі шығып кеткенінен бейхабармын. Бірақ халықтың маған неге ашуланған түсінбеймін. Не үшін?Біз батырларымызды, ұлттық нышандарымыздың бар екенін тек осындай жағдайларда еске түсіреміз, ал қалған уақытта ше? Бұл менің өмірім».
Қаркөздеріміз төсін көрсетіп мақтанса, жігіттеріміз денесін жалаңаштаса, ар жағын ойлау тіпті қорқынышты. Дегенмен дүйім жұртқа жалаңаш суреттерін жүктеп, қоғамдағы кейбір түйткілді мәселелерге қатысты өзінің позициясын дәлелдеп жүргендерге әлі де ақыл кіреді деген үміт бар, дейді қоғам белсенділері.
